11 ނޮވެމްބަރ 1997 ވަނަ އަހަރުގެ ޖުމްހޫރީ ދުވަސް އަތޮޅު ފެންވަރުގައި ކ. ގުރައިދޫ ގައި ބޭއްވުން

2023-11-08

1997 ވަނަ އަހަރުގެ ޖުމްހޫރީ ދުވަސް ކ. އަތޮޅު ފެންވަރުގައި ކ. ގުރައިދޫ މަދަރުސާގައި ބޭއްވުނީ 11 ނޮވެމްބަރ 1997 ގައެވެ.

މި ރަސްމިއްޔާތައް އެޓޯލްސް މިނިސްޓްރީގެ އިސްވެރިންނާ، މާލެއަތޮޅު ވެރިޔާ މުޙައްމަދު އާދަމާއި، މާލެއަތޮޅުގެ 9 ރަށުގެ އިސްވެރިންނާ، ޤާޟީނާ، މުވައްޒަފުންނާ، ކޮމިޓީތަކުގެ މެމްބަރުންގެ އިތުރުން ހުރިހާ ރަށެއްގެ މަދަރުސާތަކުގެ ދަރިވަރުން ގުރައިދޫއަށް ވަޑައިގަންނަވާފައިވެއެވެ.

އެ އަހަރުގެ ޖުމްހޫރީ ދުވަހުގެ ރަސްމީ ޖަލްސާ އަތޮޅުފެންވަރުގައި ގުރައިދޫ މަދަރުސާގައި ވަރަށް ކުލަގަދަކޮށް ބޭއްވި ފައިވާއިރު، އެދުވަހުގެރޭ މަދަރުސާގެ ދަރިވަރުންނާ، ޒުވާނުން އަދި ބޮޑު ބެރު ގްރޫޕް ހިމެނޭގޮތުން ސްޓޭޖްޝޯވް އެއް ބޭއްވިފައިވެއެވެ.

އަދި މީގެ އިތުރުން ގަސްއިންދުމުގެ ޙަރަކާތްތަކާއި، ތަފާތު ކުޅިވަރުގެ ޙަރަކާތްތައްވެސް ވަރަށް ފޯރިއާއެކު ހިންގިފައިވެެއެވެ. އަދި ފަތުރުވެރިންނަށް ހަދިޔާ ބަދަލްކުރުމުގެ ކަންކަންވެސް ހިންގިފައިވެއެވެ. އަދި ކ. މާފުށީގައި މުޅި އަތޮޅަށް އަމާޒްކޮށްގެން ބޭއްވި ބަށި މުބާރާތެއްވެސް ބޭއްވުނެވެ. މި މުބާރާތުގައި ގުރައިދޫ ބައިވެރިވެ ވަނީ ބަލިވެފައެވެ.

މި ޖުމްހޫރީ ދުވަހުގެ ރަސްމިއްޔާތުގެ ކަންކަން ހިންގާފައިވަނީ ކ. އަތޮޅު އޮފީހުން އިސްނަންގަވައިގެން އަތޮޅު ބަޖެޓުން ޚަރަދު ކޮށްގެންނެވެ. މި ރަސްމިއްޔާޔައް ގުރައިދޫ އަށް ވަޑައިގެންނެވި އެންމެހާ ބޭފުޅުންނަށް ވަރަށް ހޫނު މަރުޙަބާއެއް ކިޔާ މުޅި މި ދުވަސް މިރަށުގައި އަތޮޅުފެންވަރުގައި ބޭއްވުމުގައި ގުރައިދޫ ގެ ރައްޔިތުން އޭރުގެ ރަށު އޮފީހަށް ވަރަށް ފުރިހަމަ އެއްބާރުލުމެއް ދެއްވާ، 

ޤައުމީ ރޫހެއްގައި ޙަރަކާތްތެރިވެ އެކުވެރިކަމާ އެއްބައެއްވަންތަކަން ވަރަށް ފުރިހަމައަށް ދައްކާފައިވާކަން ފާހަގަކޮށްލެވެއެވެ.  އޭރު ރަށު އޮފީހުގައި އެންމެ އިސްކޮށް ހުންނެވީ ކަތީބު އަލްފާޟިލް މުޙައްމަދު މޫސާއާއި ކުޑަކަތީބު ޢަބްދުއްރަޝީދު ހާރޫނެވެ.