ފެންބޮޑުވުން (30 އޭޕްރީލް 2024)
2024-06-09
2024 އޭޕްރީލް މަހުގެ ތެރޭގައި ރާއްޖެއަށް ކުރި ވިއްސާރައިގައި 30 އޭޕްރީލް 2024 ވަނަ ދުވަހުގެ ހަވީރުން ފެށިގެން ބޯކޮށް ވާރޭވެހި ކ.ގުރައިދޫގައި ފެންބޮޑުވެ ގިނަ ގޭގެއަށް އަސަރުކޮށްފައިވެއެވެ. މި ހާދިސާއާ ގުޅިގެން ކައުންސިލާއި ރަށުގެ ރައްޔިތުން އަދި މުވައްސަސާތައް ގުޅިގެން ފެންބޮޑުވެފައިވާ މަގުތަކާ ގެތަކުން ފެން ހިންދުމުގެ މަސައްކަތް ރޭގަނޑު ވަނީ ފަށާފައިވެއެވެ. މުޅި ރަށް ފެން ބޮޑުވެ ގިނަ ގެތަކަށް ފެން ވަނުގެ ސަބަބުން މިކަން ސަރުކާރުގެ ސަމާލްކަމަށް ގެނެސް އެމްއެންޑީއެފް އަދި ޑިޒާސްޓަރ މިނިސްޓްރީއާއި ސަރުކާރުގެ ކަމާގުޅުން ހުރި އިދާރާތަކަށް ވަނީ އެންގިފައެވެ.
މިގޮތުން ކައުންސިލްގައި ހުރި ޕަމްޕާއި ސްޓެލްކޯ އަދި ޢާންމު ފަރުދުންގެ އަތުގައި ހުރި ޕަމްޕު ތައް ބޭނުންކޮށްގެން މަގުތަކާއި އެންމެ އަޑި ވެފައިވާ ހިސާބުތަކުން ފެން ހިންދުމަށް މަސައްކަތް ފެށިނަމަވެސް އެރޭގެ މެންދަން ވީއިރުވެސް ފެން ހިދޭގޮތް ވަނީ ނުވެފައެވެ. ޕަމްޕުގެ އިތުރުން ކުރިން ކައުންސިލުން ޤާއިމް ކޮށްފައިވާ ފެންހިންދާ ނިޒާމުތަކުންވެސް ފެން ބޭރުކުރަމުން ދިޔަނަމަވެސް ފެންގަޑު ނުހިދި ލަސްވާތީ އެރޭގެ 1:00 ހާއިރު އެމްއެންޑީއެފް އިން ވަނީ ޕަމްޕުތަކާއިއެކު ގުރައިދޫއަށް އައިސްފައެވެ. އަދި އެބޭފުޅުންގެ ޕަމްޕުތަކާއެކު ކުރެވުނު މަސައްކަތުން 3:00 ހާއިރު ފެންގަޑުތައް ވަނީ ހިދެން ފަށާފައެވެ.
މި ޙާދިސާ އާއި ގުޅިގެން ޙާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދެވެމުން ގޮސްފައިވެއެވެ. މިގޮތުން 10ވަރަކަށް ގޭގެ ޢާއިލާތައް ނިދޭނޭ ތަންތަން ހަމަޖެއްސުމާއި ކެއުމުގެ އިންތިޒާމްތައް ވަނީ ކައުންސިލުން ހަމަޖައްސާފައެވެ.
2023 ޑިސެމްބަަރ 31 ވަނަ ދުވަހުގެރޭ ވެސް ގުރައިދޫ ފެންބޮޑުވެ ޙާލުގައި ޖެހިފައިވާއިރު މިއީ މިއީ 2024 ވަނަ އަހަރު ވެސް މިހާބޮޑަށް ފެންބޮޑުވެ ގެތައް ޙާލުގައި ޖެހުނު ފަހަރެކެވެ. މީގެކުރިން ފެންބޮޑުވެ، ގެއްލުން ލިބުނުގެތަކަށް ސަރުކާރުން ފައިސާގެ ރަމްޒީ އެހީ ދެއްވާފައިވާއިރު އޭގެން ސަލާމްތަ ނުވެ އުޅެނިކޮށް އަނެއްކާ މިވަނީ ވާރޭވެހި ފެންބޮޑުވެފައިކަން ފާހަގަކޮށްލަމެވެ. އަދި މިފަހަރު ފެން ބޮޑުވުމާ ގުޅިގެންވެސް މިވަނީ ޙާލުގައި ޖެހި ގެއްލުން ލިބުނުގެތައް ސާރވޭކޮށް ޑިޒާސްޓަރ މނޭޖްމަންޓަށް ފޯމްތައް ފޮނުވިފައެވެ.
